БИШКЕК, 5-фев. — Sputnik. Сегиз күн мурда Ош облусунун Алай районунун Будалык айыл аймагында ууга чыгып кетип изделип жаткан тургундун сөөгү табылды. Бул туурасында ӨКМдин маалымат кызматынан кабарлашты.
Аңчы 28-январда саат 8:00дөр чамасында Сары-Күңгөй тоосун көздөй аң улоого кетип, кечки саат 16:00дө үй-бүлөсү менен байланышкандан кийин дайынсыз болуп кеткен.
Издөө иштери кечээ да иңир киргенге чейин уланып, ӨКМден сегиз куткаруучу, жергиликтүү тургундардан 120 адам жана РИИБден 9 кызматкер тартылган.
Бүгүн, 5-февралда дагы кошумча күчтөр тартылып, түшкө жуук Матишевдин сөөгү табылган. ӨКМ учурда тоодон маркумдун сөөгүн алып келүү иштери жүргүзүлүп жаткандыгын кабарлады.
Буга чейин Ысык-Көл облусуна караштуу Жети-Өгүз районунун Жети-Өгүз айыл аймагында аңчылыкка чыгып, кар көчкүдө калган 39 жаштагы жарандын сөөгү табылган.
