БИШКЕК, 2-янв. — Sputnik. 20-январда кыргызстандык Topsport.kg сайтынын тандоосу боюнча жылдын мыкты спортчулары аныкталат. Бул тууралуу аталган сайттын жетекчиси Динара Орозбаева билдирди.
Анын айтымында, быйылкы саамалык Улуттук олимпиада комитетинин мурдагы жетекчиси Мурат Саралиновго арналып, иш-чара аталган комитет менен Жаштар иши, дене тарбия жана спорт мамлекеттик агенттигинин колдоосунда өтөт.
"Мыктыларды тандоо үч жылдан бери өткөрүлүп келет. Быйыл Олимпиада комитети жана мамагенттик менен чогуу өткөрүп жатабыз. Иш-чара мамлекеттик деңгээлге чыкты. Ошондой эле Саралиновдун атындагы сыйлык негизделди. Анда спорттун олимпиадалык түрлөрү боюнча ийгилик жараткан спортчуларга акчалай сыйлык тапшырылат", — деди Орозбаева.
Эске сала кетсек, интернет добуш берүү 15-декабрда Topsport.kg сайтында, ошондой эле анын Instagram жана Facebook тармагындагы аккаунтарында башталган. Ал эми 20-январда жеңүүчүлөр аныкталып, Кыргыз улуттук филармониясында сыйлык тапшыруу аземи өтөт.
