БИШКЕК, 29-дек. — Sputnik. Улан Салянов менен аны өлтүрүүгө шектүү деп кармалган жаран тааныш болгон эмес. Бул тууралуу ИИМдин маалымат кызматынын башчысы Бакыт Сейитов Sputnik Кыргызстан агенттигине билдирди.
Белгилей кетсек, айрым ЖМКлар Салянов менен аны өлтүрдү деп кармалган киши тааныш болгонун жазып чыгышкан.
Жогорку Кеңештин депутаты Аида Салянованын иниси 6-ноябрга караган түнү киши колдуу болгон. Куралданган белгисиз кишилер анын Көк-Жар жаңы конушундагы үйүнө кирип, аны сабагандан кийин атып кетишкен.
"Кармалган жаран менен маркум тааныш болгон эмес. Шектүү маркум менен буга чейин бир гана ирет жолукканын айтты. Ал башка кишилерден Салянов үйүндө ири суммада акча кармайт деген маалымат алган. Бир нече киши менен тоноону чечишкен. Карактоо учурунда алар Саляновдон акча талап кылышкан. Бирок күтүлбөгөн жерден үй ээсинин баласы пайда болуп, маркум менен кылмышкерлер кармаша кеткенде Саляновго ок тийген", — деди Сейитов.
Учурда калган шектүүлөрдүн аты-жөнү такталып, издөө иштери жүрүп жатат.
