БИШКЕК, 26-дек. — Sputnik. Президент Сооронбай Жээнбеков 26-декабрда Казакстандын премьер-министри Бакытжан Сагинтаев менен жолукканын өлкө башчынын маалымат кызматы билдирди.
Эске салсак, Жээнбеков кечээ коңшу өлкөгө расмий иш сапары менен барган.
Жолугушуу маалында кыргыз-казак кызматташтыгы жана ЕАЭБдин алкагындагы биргелешип иштешүү боюнча сөз болду.
Казак өкмөт башчысы Жээнбековду президенттик кызматка келиши менен куттуктап, анын премьер кезиндеги биргелешкен иштерине басым жасады.
"Сиз 1,5 жыл бою өкмөттү жетектеп тургандыктан, эки өлкөнүн ортосундагы кызматташтык тууралуу жакшы билесиз. Өкмөттөр мурдагыдай эле актуалдуу маселелер боюнча кызматташтыгын улантат. Президентибиз Нурсултан Назарбаев бизге кыргыздардан жакын эл жок экенин дайыма баса белгилеп келет", — деди Сагинтаев.
Жолугушуунун аягында Сагинтаев Жээнбековдун ишине ийгилик жана КМШ өлкөлөрүнүн лидерлеринин бейрасмий жолугушуусу өтүп жаткан Москва шаарына жемиштүү барып келүүсүн каалады.
