БИШКЕК, 18-дек. — Sputnik. "Идеал Хаус" комплексинин сатылышынын мыйзамдуулугун аныктоо максатында кылмыш иши козголду. Бул тууралуу Башкы прокуратурадан билдиришти.
Көп өтпөй өкмөт башчы Башкы прокуратурага маалыматты текшерип берүүсүн суранып кайрылган.
"Сюжетте "БТА Банк" ЖАКынын директорлор кеңешинин төрагасы Темир Рыскулов премьер- министрдин классташы экени айтылат. Бирок текшерүү маалында бул эки адам эч качан бирге окубаганы, окуучулук кезде жолукпаганы белгилүү болду. Рыскулов Бишкек шаарында №5 гимназияны 1993-жылы аяктаган. Ал эми Исаков Ош шаарындагы №16 мектеп-гимназиясында билим алып, аны 1994-жылы бүтүргөн", — деп айтылат билдирүүдө.
Башкы прокуратуранын маалыматына караганда, журналисттик иликтөөнүн башка бүтүмдөрү дагы аныкталган жок. Мисалы, менчиктештирүү келишимине өкмөт башчынын бир тууганы Капар Исаковдун тиешеси бар экени жана "БТА Банк" ЖАКта Кыргызстандын үлүшү азайганы далилденген эмес.
Коомчулуктун кеңири кызыгуусун жараткан бул иштеги маселелерди иликтеп көрүү максатында Башкы прокуратура КРдин кылмыш жана жаза кодексинин 304 (кызматтык абалынан кыянаттык менен пайдалануу) жана 307 (менчиктештирүү, салыктык, бажылык же лицензиялык ишти жүзөгө ашырууда кызмат абалын мыйзамсыз пайдалануу) беренелери боюнча кылмыш ишин козгоду.
