БИШКЕК, 15-дек. — Sputnik. ЕАЭБдеги ишканалардын бирдиктүү реестрине Кыргызстандын дагы 42 ишканасын кошуу пландалып жатканын Россия өкмөтүнүн башчысынын орун басары Аркадий Дворкович журналисттерге билдирди.
Дворковичтин айтымында, мындай маселенын чыгышына ЕАЭБдин жаңы түзүлгөнү жана кыска мөөнөттө жалпы стандарттарды түшүнүүгө убакыттын аздыгы сеьеп болгон. Ал көйгөйлөр жаралбашы үчүн тезинен чараларды көрүү керектигин кошумчалады.
"Түзүлгөн көйгөй убактылуу деп ойлойм, ал да чечилет. Дагы 42 ишкананы киргизүүнү пландап жатабыз (ЕАЭБдин бирдиктүү реестри – ред.)", — деди ал.
Кыргызстандын вице-премьери Толкунбек Абдыгулов сертификациядан өтө турган ишканалардын санын көбөйтүү жана продукцияларды текшерүүсүз ташуу маселеси Дворкович менен болгон тар чөйрөдөгү жолугушууда дагы көтөрүлгөнүн билдирди.
