БИШКЕК, 15-дек. — Sputnik. 15-декабрдан тартып Бишкек шаарындагы коомдук транспорт каттамдарын тейлеген ташуучулар жана айдоочулар арасында сынак жарыяланды. Бул тууралуу мэриянын маалымат кызматы билдирди.
Сынак жүргүнчүлөрдү ташуунун сапатын жакшыртуу, ошондой эле каттамдарды тейлеген ташуучуларга дем берүү максатында уюштурулду.
"Бүгүнкү күндө коомдук транспорттордун ишин жакшыртуудагы көйгөйлөрдү чечүү үчүн комплекстүү чечимдер талап кылынат. Буга жүргүнчүлөрдүн айдоочулар менен тейлеген компанияларга карата болгон даттануулары далил боло алат", — деп айтылат маалыматта.
Жеӊүүчүлөрдү аныктоодо кыймылдуу курамдын техникалык жана санитардык абалы, жол кыймылы эрежелеринин сакталышы, жүргүнчүлөрдү тейлөө маданияты, шаар тургундары тарабынан каттамдын ишине арыз, даттануулардын жоктугу эске алынат.
