Караколдук жеткинчек Галкинге ак калпак кийгизди. “Лучше всех” шоусунун видеосу

Кыргызстандык жеткинчек Албанали Алим уулу Максим Галкиндин "Лучше всех" шоусуна тартылган видеосу Биринчи каналдын расмий сайтына жарыяланды. 

Албанали шоуго чыгары менен эле Галкинге кыргыздын ак калпагын кийгизди. Андан соң мектебиндеги окуялары туурасында айтып “класста жалпы 33 окуучу окуйт. Мен — премьер-министр, Артем — президент экөөбүздүн ондон жардамчыбыз бар. Калган 11 баланын бирөө бейбаш, анын атын унутуп калдым” деп ар бир сөзүнө юмор аралаштырып сүйлөп жатты. Андан соң алып баруучу экөө жаныбарлар дүйнөсүнө сапар тартышып ар бир айбанаттын өзгөчөлүгүн айтып берген. Ал сүйлөгөн сайын залдагылардын күлкүсү жаңырып турду. 

Буга чейин жеткинчектин атасы Алим Малдыбеков баласы булардын баарын китептен, интернеттен көрүп билип алганын айткан. 

"Мурда бир нерселерди айтып берсе ишенбей, анча маани берчү эмесмин. Кийинчерээк интернеттен карап текшерсем туура чыгып жатты. Биз билбегендин баарын билет. Мисалы, көк киттин жүрөгү 700 килограмм, боору бир тонна болот, дагы бир жаныбар ордунан төрт метрге чейин секире алат деп таң калтырат", — деди Малдыбеков.

Албанали жети жашта. Атасы экөө ноябрь айынын башында Москвага барып эфирге тартылып келишкен. Беш бир тугандын эң кичүүсү, учурда Каракол шаарында жашашат. 

Эскерте кетсек, буга чейин аталган долбоорго Кыргызстандан Брюс Линин ыкмаларын өзүндөй кылып туураган Нурмухаммед Ташмаматов жана бий өнөрү менен интернетти багындырган Нурпери Тургуналиева катышып келген.