БИШКЕК, 9-окт. — Sputnik. 90-жылдары "Кыргызымдын жигиттери" деген чыгармасы менен эл оозуна алынган ырчы Клара Алибековага милиция кызматкерлери мыскылдаган суроолорду узатып жаткан видео тарап коомчулуктун нааразычылыгын жаратты. Мындан сырткары, президенттик шайлооодо добуш сатпоого түрдүү чакырыктар чыгып жатат.
Sputnik Кыргызстан агенттиги артта калган аптада социалдык тармактарга чыккан кызыктуу сүрөт, видеолор топтомун сунуштайт.
1. Таланты менен таанылган кыргыз кызы. Бий өнөрү менен интернетти багындырган Нурпери Тургуналиева "Лучше всех" долбооруна барып россиялыктарды таң калтырды.
2. Шайыр жигиттер Астанада. Август айында Астанада өткөн "Жайдарман" лигасында Кыргызстандын "Позитив" КВН командасы баш байгени багындырган. Алар кандай тамашаларды аткарды бул жерден көрүңүз.
3. Түнкү Ош. Бейшемби күнү байыркы Ош шаары 3017 жылдыгын белгиледи. Бул видеодон калаанын түнкү көрүнүшүн көрө аласыздар.
4. Добуш сатууга жаза. Вайнерлер добушуңду сатып алууга аракет көргөн адамдарга кандай чара көрүү керектигин көрсөтүп берди.
5. "Коб" да үн катты. Жада калса "Коб" дагы добуштардын сатылуусуна тынчсызданып породия жараткан.
6. Милициянын шылдыңы. Ырчы Клара Алибекова алгач кол салуу болгонун айтып, тартип сакчыларына кайрылат. Бирок милиция кызматкерлери ага дароо жардам бергендин ордуна мыскылдаган суроолорду берип, шылдыңдап видеого тартып интернетке жүктөп коюшкан. Ал "Акыл-эсин камчылап аккуладай алкынат, ай-жылдызга талпынат кыргызымдын жигиттери" деп ырдап жатканда кийин айрым кыргыз жигиттеринен азап чегип калам деп ойлобосо керек.
7. Соцтармак милицияга нааразы. Акын Бердибек Жамгырчиев "Клара, кыргызыңдын жигиттери сени баалап барктай албай жатабыз. Сенин талантың ушундай бети жок замандын таманына тапталып жатканына өтө өкүнөм" деп кайгырган. Видео чыккандан кийин ушул сыяктуу комментарийлер соцтармакка жайнады.
8. Кыргыз жигиттери… Москванын түндүк-батышындагы "Синдика" курулуш базары өрттөнүп кетти. Видеодогу кыргыз жигиттери ошол жерден унааны сүйрөп чыгышууда.
9. Тамашакөй милиционер байке. Өзүн Криштиану Роналду деп тааныштырган Кайгуул милиция кызматкеринин видеосу Instagram социалдык баракчасын багынтууда.
