БАТКЕН, 1-дек.— Sputnik. Баткен облусунун Самаркандек айылынын тургуну, үй кожойкеси Инават Рустамова 43 жылдан бери чачына бир ирет да кайчы тийгизген эмес. Азыр чачынын узундугу 2 метрге чукул.
Өзүнүн бою 1,65 сантиметр. Ал кабарчыга эмне үчүн жер чийген чачка кызыгып калганын айтып берди.
"Мектепте окуп жүргөн кезимде эле чачым боюм менен бирдей болчу. Жерге тийип калбашы үчүн өрүп алчумун. Апам 65 жашта каза болгон. Чачы узун эле, ак түшкөн эмес. Эжем экөөбүз да апамды тартып, чачыбызды кырккан жокпуз. Азыр кыздарымды да узун алып жүргүлө деп айтам" — деди Рустамова.
Чач кайраттуу, жылмакай болуш үчүн Инават айым жалбыздын чөбүн кайнатып, суусуна бир кашык уксус кошуп, чачын жууй тургандыгын айтып берди.
"Мындан сырткары зайтун, зире майлары менен бир айда бирден майлап турам. Ушул убакка чейин бир да жолу боек колдонгон эмесмин жана ак аралаган жок. "Аялдарга 25 кеңеш" деген китеп жазгам, ал демөөрчү табылаары менен басылат. Китепте бетке кам көрүүнүн сырлары жана чачты кантип багып жана канткенде ак түшүрбөш керектиги тууралуу баяндалган ", — деп айтып берди ал.
Рустамова айыл чарба багыты боюнча билим алган. Бирок учурда үй кожойкеси.
