БИШКЕК, 1-дек. — Sputnik. Контрабандалык жол менен Кыргызстанга алып келинген башка дагы арстандын күчүктөрү болушу мүмкүн. Бул тууралуу Мамлекеттик экотехинспекциянын Бишкек шаары боюнча башкы экологу Медет Анарбек уулу билдирди.
Буга чейин Бишкекте зоопарк директорунун эшигинин алдына белгисиз кишилер арстандын күчүгүн таштап кетишкени кабарланган.
"Кызыл китепке кирген жаныбарды Кыргызстанга тиешелүү документтери менен алып келүү керек. Ал жаныбар биздин каттоодо жок, демек аны контрабандалык жол менен алып келишкен. Бул биринчи окуя эмес, мындан улам арстандын күчүгүн мыйзамсыз алып келип жаткандар дагы чыгышы мүмкүн", — деди Анарбек уулу.
Эскерте кетсек, октябрь айында Бишкекте каргы тагылган арстандын күчүгүн жетелеп жүргөндөр тууралуу кабар тараган. 1-ноябрда тиешелүү документтердин жоктугуна байланыштуу жаныбар ээсинен алынып, айбанаттарды коргоочуларга өткөрүп берилген. Кичинекей жырткычка Акжолтой деген ат коюлган.
