БИШКЕК, 2-ноя. — Sputnik. Бишкектин көчөлөрүндө мойнуна каргы тагылып жетекте жүргөн арстандан күчүгү "ээсинен" алынып, "Бугу Эне" коомдук фондусуна өткөрүп берилди. Бул тууралуу Мамэкотехинспекциянын маалымат кызматынан билдиришти.
31-октябрь күнү борбор калаанын көчөсүндө жаш жигит арстандан күчүгүн мойнуна каргы тагып жетелеп алып, элге аны менен акча төлөп сүрөткө түшүүнү сунуштап жүргөнү тууралуу маалымат тараган.
Кийин бишкектик жаран жаныбар сатылып кеткенин билдирген.
Издөө иштеринин жыйынтыгында, Мамэкотехинспекциянын кызматкерлери арстандын күчүгүн таап алышты.
"Инспекторлор жеринен протокол түзүп, жаныбарды "Бугу эне" коомдук фондусуна өткөрүп беришти. Ага Акжолтой деген ат коюлду", — деп айтылат билдирүүдө.
Мамэкотехинспекциядан билдиришкендей, арстан Кызыл китепке киргизилген. Ал эми NABU уюмунан жаныбар шаарда жашай албасын айтып, аны жапайы жашоого даярдоо үчүн Ысык-Көлдөгү реабилитация борборуна жеткирүү керектигин кошумчалашкан.
