Абактан качкандардын төртүнчүсү камыштарда бекинип жүргөн. Окуянын чоо-жайы

БИШКЕК, 1-дек. — Sputnik. Чүй облустук ИИБдин кызматкерлери бүгүн таңкы саат төрттө Сокулук РИИБдин убактылуу кармоочу жайынан качып кеткен Кайрат Жанботоевди кармашты.

27-ноябрда Сокулук РИИБдин убактылуу кармоо жайынан төрт киши качып кеткен болчу. Буга чейин качкандардын үчөө кармалган.

Качкындарды кармоо үчүн өлкөдө "Сирена" планы жарыяланып, ага укук коргоо органдарынын жана өлкөдөгү милиция кызматкерлери катышкан.

Милиционерлерге качкындар Бишкек менен Чүйдүн аймагында жүргөнү тууралуу маалымат келип түшкөндүктөн, аталган аймактарда издөө иштери күчөтүлгөн.

"Качкындардын экөө кандай унаа менен кайсы тарапты көздөй кеткендиги боюнча түшкөн маалыматтын арты менен кармоого мүмкүн болду. Үчүнчүсү дагы ошол эле схема менен кармалган. Ал эми төртүнчүсү Чүй облусунун Москва районунан болгондуктан, аймакты жакшы билчү. Буга ылайык аны издөөгө көбүрөөк убакыт кетип калды. Күчөтүлгөн издөө иштери Спартак айылына жакын жерде жүргүзүлүп, качкын камыштардын арасынан кармалды", — деп ИИМдин маалымат кызматынан билдиришти.

Төрт качкын карактоо жана адам өлтүрүү беренелери боюнча айыпталып, 5 жылдан 12 жылга чейин эркинен ажыратылышы мүмкүндүгү айтылган. Бирок алар сот отуруму болор алдында качып кетишкен. Эми аларга Кылмыш жаза кодексинин 336-беренеси (качуу) боюнча дагы кылмыш иши козголду. Ага ылайык, алар кошумча 3 жылдан 5 жылга чейин эркинен ажырашы мүмкүн.