БИШКЕК, 29-ноя. — Sputnik. Дүйшөмбү күнү Сокулуктун ички иштер бөлүмүнүн убактылуу кармоочу жайынан качып чыккан төрт кишинин үчүнчүсү кармалганын ИИМ билдирди.
Маалыматка караганда 28-ноябрда кечки саат 21.00дө "Сирена" ыкчам планын ишке ашыруу маалында милиция кызматкерлери качкынды Бишкектин Исанов жана Бөкөнбаев көчөлөрүнүн кесилишенен колго түшүргөн.
Кармалган жаран Түркмөнстанда туулган 32 жаштагы болуп чыкты. Ал Кылмыш жаза кодексинин "Каракчылык", "Документтерди уурдоо, жок кылуу" жана "мүлктү атайылап жок кылуу же бүлдүрүү" беренеси менен айыпталып кармалган.
Түрмөдөн качуу фактысынан улам Сокулук районунун ички иштер бөлүмүнүн жетекчилиги кызматтан алынган.
Ал эми "Адам өлтүрүү" беренеси боюнча кармалган Чүй облусунда төрөлгөн 28 жаштагы Кайрат Жанботоевди издөө уланууда.
Милиция качып кеткен жарандар тууралуу кандайдыр бир маалымат билгендерди 0 312 43-88-91, 43-88-85, ИИМдин нөөмөт бөлүмү 0 312 662331 же 102 телефондору аркылуу кайрылууну суранат.
