Кыргыз эл акыны Майрамкан Абылкасымованын бул сүрөтү 1984-жылы Чүй облусундагы Чуңкурчак жайлоосунда тартылган. Анын жанында жергиликтүү тургун — Камчыбек Максутов.
Акын Абылкасымованын айтымында, союз маалында чыгармачылыктагы достор тоого байма-бай барып турчу. Сүймөнкул Чокморов, Төлөмүш Океев, Салижан Жигитов, Ашым Жакыпбеков, Аман Токтогулов өңдүү кыргыздын көрүнүктүү инсандары Чуңкурчакка барып эс алып турар эле.
"Жумуш күнү же дем алышта Сүймөнкул Чокморов автоунаасын айдап келет. Чогулуп алып тоого жөнөйбүз, чарчаганда эч нерсеге карабай ал жакка кетип калчубуз. Ырдап, жазган чыгармаларыбызды окуп, тамашалашып отурар элек. Анан бизди көргөн жергиликтүү малчылар коюн союп, кымызын даярдап берчү", — деп эскерет Абылкасымова.
Ал кезде Токтогул атындагы мамлекеттик сыйлыгынын лауреаты "Ала-Тоо" журналынын поэзия бөлүмүн жетектеп, 48 жашта болгон.
