БИШКЕК, 15-ноя. — Sputnik. Казакстандын айыл-чарба министрлиги Кыргызстан кайта жөнөттү деген жумуртка боюнча маалыматты төгүнгө чыгарганын Sputnik Казакстан маалымат агенттиги жазып чыкты.
"14-ноябрда айрым казак ЖМКларына Костанайдан Кыргызстанга жиберилген 302 400 даана жумуртка "Ак-Тилек" постунан Кыргызстандын ветеринардык кызматы тарабынан Казакстанга кайта жиберилди деп тарап кеткен маалымат чындыкка дал келбейт", — деп айтылат маалыматта.
Ага ылайык, Костанай облусунан жүктөлгөн 324 миң жумуртканын партиясы мамлекеттик чек арадан 5-октябрда өткөн. Анда аталган жумуртка "Бірлік — Ынтымақ-2008" ишканасы тарабынан Кыргызстан аркылуу Тажикстанга жөнөтүлгөн.
Жыл башынан бери Кыргызстандан Казакстанга жумуртка кайтаруу боюнча бир дагы факты катталбаганы маалыматта белгиленген.
