Төрт күндүк эс алуудан кийин кайра жумуш ордубузга отуруп калдык. Бул күндөр башкалар үчүн кандай болду билбейм, биз журналисттер түзүк эле майрамдадык. Анткен менен биз деле дарыгерлер сыяктуу жумушубузду толук таштап кете албайбыз. Анткени майрам күндөрү да коомду дүрбөткөн окуялар болбой койгон жок.
Баса, журналисттер да бирөөнү баласы экенин билет белеңиз? Алар да сиз сыяктуу күткөндү жаман көрөт, телефонго жооп бербей качкандарды айтпай эле коёюн. Ал эми эфирге кечигип, анан "эмелеп" сүйлөп отуруп алганда кирерге жер таппай каласың. Журналисттердин жаны дагы кандай учурда кашая турганын билип, тыянак чыгарсаңыз бизди бакытылуу кылган болосуз. Эми арта калган күндөрдөгү маанилүү жаңылыктарга өтөлү.
Ишемби күнү таң атпай прокуратура президенттик шайлоодон экинчи орунду алган Өмүрбек Бабановго кылмыш ишин козгоду. Бирок ал бул ишти саясий куугунтук катары кабылдап, ар бир адилетсиз иштин аягы жакшы бүтпөй турганын эскертти.
Ал эми дүйшөмбүгө караган түнү белгисиз адамдар ЖК депутаты Аида Салянованын бир тууган инисин атып кетишти. Милиция бул иште саясий боёк жок десе, маркумдун жакындары ал унаа оңдоп иштеп үй-бүлөсүн бакчу, өзүнө душман күтө турган иш жасаган эмес дешет. Кылмышка шектүүлөр изделип жатат.
Кыргыз эли бычакка сап болчу жигити Темир Жумакадыровдон ажыраганына кечээ туура бир ай болду. Аны жакын досу, КТРКнын башкы директору Илим Карыпбеков эскерип көзгө жаш алдырды.
Жолдо кыйылган өмүрлөр. Тынч жашоонун үч күнүндө эле жол кырсыгынан 19 адамдын өмүрү кыйылды. Чыңгыз Айтматов поспектисинде 5 адам көз жумса, эртеси Таш-Көмүрдө 10 киши жарык дүйнө менен кош айтышты. Кечээ Бишкек — "Манас" аэропорту жолунда дагы төрт мекендешибизди узаттык. Алардын көбү 40 жашка чыга элек жаштар экен. Айрымдарынын он гүлүнөн бир гүлү ачылбай кете берди.
Валюта наркы. Сомдун баасы долларга карата орто эсеп менен 69. 44 (сатып алуу) жана 69.79 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгүсү 41.90 сом, АИ-92 үлгүсүндөгүсү 39.40 сом, ал эми дизель майы 37.50 сомдон сатылууда.
Соңку сөз. Күнүңүздөр куунак өтсүн!
Эсендигиңизди тилеп Эламан Карымшаков.
