БИШКЕК, 7-ноя. — Sputnik. Өткөн жолун унуткан эл келечекке жол таппайт. Бул тууралуу президент Алмазбек Атамбаев 7-8-ноябрь Тарых жана ата-бабаларды эскерүү күнүнө карата жасаган кайрылуусунда айтты. Куттуктоо сөзү өлкө башчынын сайтына чыккан.
Президент быйыл Кыргызстанда алгачкы жолу Тарых жана ата-бабаларды эскерүү күндөрү белгиленип жатканына токтолду.
"Өкмөткө тарыхый эстеликтерди реконструкциялоо жана көркүнө келтирүү, элибиздин өнүгүүсүнүн өзөктүү этаптарын илимий изилдөөлөрдү жүргүзүү боюнча тийиштүү иш-чараларды иштеп чыгуу тапшырылды. Анын ичинде Улуу Кыргыз каганаты калыптанган жана гүлдөп өнүккөн мезгил, карахандар доорундагы кыргыздардын жашоо-турмушу, жунгар жапырыгы жана Кокон хандыгынын баскынчылыгы учурунда элдин башынан өткөн кыйынчылыктары, ошондой эле Россия элдери менен жөнөкөй эмес, бирок үзүрлүү жана кыргыз мамлекетинин кайра жаралышына алып келген биргелешкен тарыхы да бар. Эгемендүү Кыргызстандын акыркы 26 жылдагы драматизмге жана тагдыр чечүүчү окуяларга жык толгон соңку жаңы тарыхын изилдөө да абдан маанилүү", — деди Атамбаев.
Президент 7-ноябрда Улуу Октябрь Социалисттик революциясына 100 жыл толгонун айтып, 1917-жылы Россияда болгон окуялардын, Февраль, андан соң Октябрь революцияларынын мааниси, алардын дүйнөлүк тарыхка, анын ичинде Кыргызстандын тарыхына тийгизген таасири баа жеткис экенин кошумчалады.
Мамлекет жетекчиси өз сөзүндө өткөн жолун унуткан эл келечекке жол таппай турганын баса белгиледи.
