БИШКЕК, 7-ноя. — Sputnik. Президент Алмазбек Атамбаев бүгүн, 7-ноябрда Тарых жана ата-бабаларды эскерүү күндөрүнө байланыштуу "Ата-Бейит" улуттук тарыхый-мемориалдык комплексинде болду. Бул туурасында мамлекет башчынын маалымат кызматынан кабарлашты.
1916-жылдагы трагедиялуу окуяларда курман болгондордун мемориалына, саясий репрессиялардын курмандыктарынын эстелик-мемориалына, Чыңгыз Айтматовдун бейитине гүл коюлду.
Тарых жана ата-бабаларды эскерүү күндөрүнүн алкагында президент Бишкектеги Жеңиш аянтына барып, 1941-1945-жылдардагы Улуу Ата Мекендик согуштун ардагерлеринин жана ооруктун эмгекчилеринин элесин эскерип, өчпөс отко гүл койду.
Маалымат кызматы Тарых жана ата-бабаларды эскерүү күнүнө карата Кыргызстандын калыптануусундагы жана өнүгүүсүндөгү тарыхый инсандардын ролуна байланыштуу иш-чаралар өлкөнүн бардык аймактарында облус, район жетекчилеринин катышуусунда өтөрүн кабарлады.
