БИШКЕК, 6-ноя. — Sputnik. "Ак-Тилек" өткөрүү бекетиндеги жүк ташуучу унаалардын саны азайып, 70-80дей машина калды. Бул тууралуу Чек ара кызматынан билдиришти.
Буга чейин чек арада кезек күтүп 300гө жакын фура турган.
Маалыматка караганда, кезек күткөндөрдүн санынын кыскарышына жекшемби күнү казакстандык чек арачылардын 200дөй унааны киргизгени себеп болду.
"Өткөрүү бекетинде бош унаалар көп болчу. Ошол себептүү аларды мурда сүйлөшүлгөндөй тез-тезден өткөрүштү. Азырынча кандайдыр бир бүтүм чыгарууга эрте, бирок муну жылыш деп айтууга болот", — деп айтылат билдирүүдө.
Ошондой эле Чек ара кызматынан учурда "Ак-Жол" пунктунда кезек күткөн унаалардын саны 15-20дай экенин кошумчалашты.
