БИШКЕК, 3-ноя. — Sputnik. Бүгүн, 3-ноябрда, Бишкектеги Казакстандын элчилигинин алдына 70-80дей киши нараазычылык акциясына чыгышты. Бул тууралуу коомдук ишмер Турсунбек Акун билдирди.
Акцияга чогулгандар менен элчинин өкүлдөрү чыгып жолуккан.
"Биз 5-ноябрга чейин кыргыз-казак чек арасын ачуу өтүнүчү менен кайрылдык. Эгер ачылбаса биздин өкмөттөн ЕАЭБден чыгуусун талап кылабыз. Элчинин өкүлдөрү биздин айткандарыбызды казак өкмөтүнө жеткирүү милдетин алышты", — деди Акун.
Белгилей кетсек, кыргыз-казак чек арасындагы абал 10-октябрдан тарта оорлой баштаган. Казак тарап мындай кырдаал катезчилик жолу менен алынып келген импортко каршы күрөшүүнүн айынан болуп жатканын билдирген. 18-октябрда Сапар Исаков Астанага иш сапары менен барып, чек арада турган жарандарды, жүргүнчү ташыган автобустарды жана жеңил автоунааларды өткөрүү боюнча макулдашкан.
Бирок чек арадагы абал өзгөрүүсүз калууда.
