БИШКЕК, 2-ноя. — Sputnik. Эгерде расмий Бишкек биргеликте иштөөдөн баш тартса Астана чек арадагы көзөмөлдү күчөтүүгө аргасыз болот. Бул тууралуу Sputnik Казакстан маалымат агенттиги өлкөнүн Финансы министрлигинин мамлекеттик кирешелер комитетинин жетекчи орун басары Госман Амринге таянуу менен билдирди.
Амриндин айтымында, чек арадагы абал бажы, салык, фитосанитардык жана транспорт мыйзамдарын бузуу жолу менен өлкөгө көп көлөмдө келген товарлардан улам болууда.
Ал ошондой эле Казакстан буга чейин да чогуу иштешүү боюнча демилге көтөргөнүн бирок, ал керектүү колдоо таппаганын билдирди.
Амрин андан сырткары, тараптар маалымат алмашуу боюнча бир пикирге келгенин кошумчалады.
"Кыргызстанга кайсы товар кандай баа менен келип жатканы боюнча маалымат бергиле деп айттык. Биз өзүбүз тараптан өткөн жумада расмий түрдө бардык маалыматты бердик. Коңшулардан азырынча андай маалымат ала элекпиз", — деди ал.
Белгилей кетсек, кыргыз-казак чек арасындагы абал 10-октябрдан тарта оорлой баштаган. Казак тарап мындай кырдаал катезчилик жолу менен алынып келген импортко каршы күрөшүүнүн айынан болуп жатканын билдирген. 18-октябрда Сапар Исаков Астанага иш сапары менен барып, чек арада турган жарандарды, жүргүнчү ташыган автобустарды жана жеңил автоунааларды өткөрүү боюнча макулдашкан.
