БИШКЕК, 22-июл. — Sputnik. Чүй облусунда өспүрүм кызды жаман жолго азыгырган деген шек менен 19 жаштагы бала изделүүдө. Бул туурасында аталган облустун милициясынан кабарлашты.
14 жаштагы кыздын жоголгондугу туурасында 11-июлда Аламүдүн райондук милициясына апасы арыз менен кайрылып, өспүрүм саат 12.00дө үйдөн чыгып кетип, кайра келбегенин маалымдаган.
Эртеси жоголгон кыздын апасы милицияга кайрылып, кеп болуп жаткан бала кызды уурдап кетти деп божомолдоп жатканын айтып, тартип сакчыларынан ага карата чара көрүүнү суранган.
Төрт күн издегенден соң табылган кызды милиция, 15-июлда ата-энесин өткөрүп берген.
Аталган факты боюнча Кылмыш жаза кодексинин 132-беренесинин негизинде ("Он алты жашка толо элек адам менен жыныстык катнашта болуу жана сексуалдык мүнөздөгү башка аракеттерди жасоо) иш козголуп, бала издөөгө алынган.
Милициядан тергөө иштери жүрүп жаткандыгын кошумчалашты.
