БИШКЕК, 24-окт. — Sputnik. Борбор калаада жаңы салынып жаткан көп кабаттуу үйдүн жанындагы курулуш урап түшүп, андан жабыркап, ооруканага жеткирилгендердин экөө учурда дарыланып жатат.
Эске сала кетсек, 23-октябрда Бишкекте "Авангард-Стиль" компаниясына таандык жаңы салынып жаткан көп кабаттуу үйдүн жанындагы курулуш ураган.
Бишкек шаардык Травматология жана ортопедия улуттук борбордун жетекчиси Сабырбек Жумабековдун айтымында, кырсык болгон күнү ооруканага 12 адам жеткирилген. Учурда алардын ичинен оор абалда деген экөө калып, башкалары үйүнө чыгарылган.
"23-октябрда саат 15:00дөн тарта бир эле учурда 12 адамды бул борборго алып келишти. Анын экөө оор, тагыраагы эсин жоготкон абалда болчу. Реанимацияга жаткырып, текшерүүдөн өткөрдүк. Бирөөнүн колу чыгып кеткен экен, кайра киргиздик. Экинчисинин буту-колу сыйрылып, шок абалында болгон", — деди Жумабеков.
Алар ооруканадан түшкөндөн эки сааттан кийин жалпы бөлүмдөргө которулуп, он куруучу үйлөрүнө коё берилген.
"Денелери сыйрылып, эттери бир аз жанчылып, чоюлуп калган экен. Олуттуу жаракат жок болгондуктан, амбулатордук жардам көрсөтүп, үйлөрүнө кетирдик. Учурда бизде эки бөлүмдө эки бейтап жатат, акыбалдары жакшы. Акыл-эси тунук, сүйлөп жана басып жүрүшөт. Өмүрлөрүнө коркунуч жок. Жакынкы күндөрү ооруканадан чыгышат" — дейт Жумабеков.
Бейтаптарды кепке тартканда…
Sputnik Кыргызстан эки бейтап менен сүйлөшүп, окуянын кандай болуп кеткенин угуп, абалына кызыкты.
Экинчи жабырлануучу 22 жаштагы Муратбек уулу Арсендин колу-буту сыйрылып, бул жерге эс учун жоготкон абалда келген.
"Авангард-Стиль" компаниясында үч жылдан бери эмгектенем. Ден соолугум жакшы болуп калды. Фирма карап жатат. Ал күнү эмне болгону так эсимде жок. Биз ошол маалда имараттын алдында жайгашкан бассейнде жүргөнбүз. Мындай окуя болуп кетет деп кимдин оюна келиптир. Ичин жөн эле караштырып жатканбыз. Катуу үн угулганын бир билем… Көзүмдү ачсам ооруканада экенмин. Колу-бутум сыйрылыптыр. Жыгылсам керек, уранды басып деле калган жок. Азыр ден соолугум Кудайга шүгүр", — деди Арсен.
Ал курулуштагы ишин улантаары саламаттыгына байланыштуу экендигин кошумчалады.
