БИШКЕК, 20-окт. — Sputnik. Акыркы убактарда алысты көрбөй калгандар көбөйгөнүн офтальмолог Валентина Усенко Sputnik Кыргызстан агенттигинин мультимедиалык маалымат борборунда өткөн жыйында билдирди.
Ал мындай нерсенин негизги себеби балдарга жаштайынан планшетти карматып, компьютерге отургузгандан улам экенин баса белгиледи. Ал ошондой эле компьютердин жашоого тыгыз кириши менен кеңседе отурган кызматчылардын көбү алысты жакшы көрбөй, андан жабыркап жүргөнүн кошумчалады.
Дарыгер биринчи кезекте офтальмологго кайрылуу керектигин эскертет, себеби ал көздүн иштеши үчүн ыңгайлуу шарт түзүп берүүгө жол көрсөтөт.
"Ар бир 30-40 мүнөт сайын 10 мүнөттөй алысты-жакынды карап көзгө көнүгүү жасоо керек. Анткени көздүн булчуңдары эс алышы керек. Отурган ордуңузда эле компьютердин бетинде 5 миллиметрдик нерсени чийип, аны жакындан 10 секунд, алыстан дагы ошончо кароо зарыл. Булчуңдар жыйрылып, кайра жазылып чыңалуу кетет", — деди дарыгер.
Ал ошондой эле компьютерде иштеп жатканда атайын көз айнек тагынуу керектигин, себеби компьютерден иондолгон аба чыгып көздү ачыштырарын кошумчалады.
Дарыгерлердин маалыматына ылайык, Кыргызстанда кишилердин көбү алысты жакшы көрбөйт. Экинчи орунда глаукома дарты турат. Үчүнчү орунда катаракта. Жыл сайын Кыргызстанда 135 миңден ашык кишинин көрүүсү начарлаганы аныкталат.
Валентина Усенконун кеңешин толугу менен бул жактан окуңуздар>>
