БИШКЕК, 19-окт. — Sputnik. Дарыгерлер адамдардын көрүүсү начарлаган учурлардын 80 пайызын жөнгө сала алат. Бул тууралуу Sputnik Кыргызстан агенттигинин мультимедиалык борборунда өткөн маалымат жыйын учурунда Медициналык жардам уюштуруу жана дары-дармек саясаты башкармалыгынын жетекчиси Саматбек Тойматов билдирди.
Медициналык жардам уюштуруу жана дары-дармек саясаты башкармалыгынын жетекчиси Саматбек Тойматов
Ал Дүйнөлүк саламаттык сактоо уюму берген маалыматтарга таянып, жыл сайын дүйнө жүзүндө көрүүсү начарлай баштаган 285 миллион адам катттоодон өтөрүн, алардын 19 миллиону балдар экенин айтты.
"Бейтаптар убагында дарыгерге кайрылганда көрүүсү начарлаган учурлардын саны 80 пайызга кыскармак", — деди Тойматов.
Штаттан сырткаркы башкы офтальмолог жана Улуттук госпиталдын микрохирургия бөлүмүнүн жетекчиси Салтанат Иманбаеванын айтымында, Кыргызстанда бир жыл ичинде 15 жаштан өйдө курактагы адамдар көз оорусу менен каттоодон өтөт. Бейтаптардын көпчүлүгү алысты көрбөй калган (40 пайыз), ошондой эле глаукома (35 пайыз) жана катаракта (25) менен жабыркашат.
Жыл сайын 35 миңден ашык бала (15 жашка чейинки) көз оорусуна чалдыгат.
