БИШКЕК, 18-окт. — Sputnik. Кыргызстандын премьер-министри Сапар Исаков казакстандык кесиптеши Бакытжан Сагинтаев менен жолукту. Бул тууралуу казак өкмөтүнүн маалымат кызматы билдирди.
Ага ылайык, тар чөйрөдөгү жолугушуу өтүп, учурда тараптар кеңейтилген тартипте жолугууда.
Казак өкмөтүнүн маалыматына ылайык, Исаков баштаган делегациянын курамында биринчи вице-премьер-министр Толкунбек Абдыгулов, тышкы иштер министри Эрлан Абылдаев, финансы министри Адылбек Касымалиев, экономика министри Артем Новиков, Мамлекеттик бажы кызматынын төрагасы Азамат Сулайманов, Салык кызматынын башчысы Октябрь Абдыкаимов жана башкалар бар.
"Бул жолугушууну кыргыз тарап демилгелеген", — деп айтылат маалыматта.
Андан сырткары, казак өкмөтүнүн сайтындагы маалыматка ылайык, январь-июль айында эки мамлекеттин ортосундагы товар айлануу 399,2 миллион долларды түзгөн. Бул былтыр ушул убакка салыштырмалуу 28,1 пайызга же 87,6 миллион долларга көп.
Эске салсак, 10-октябрда, кечинде кыргыз-казак чек арасындагы үч өткөрүү бекетинде көзөмөл күчөтүлүп, кезек күткөн адамдардын жана унаалардын саны өсүп, жөнөкөй элди бушайманга салган. Бир күн өткөн соң Казакстандын Улуттук коопсуздук боюнча комитети өлкөнүн бардык чек араларында атайын операция жүргөндүктөн жогорудагыдай кырдаал түзүлгөнүн маалымдаган.
