Москвада шайлоого катыша албай нааразы болгон кыргызстандыктарга ТИМ жооп берди

БИШКЕК, 15-окт. — Sputnik. Москвада президенттик шайлоого катышууга келгендердин көпчүлүгү тизмеден өздөрүн таба албай нааразы болушууда. Бул тууралуу Sputnik Кыргызстан агенттигине күбө Зулпидин Нурматов билдирди.

Анын айтымында, эртең менен Кыргызстандын элчилигинде жайгашкан шайлоо участогуна 1000ге чукул киши чогулган.

"Эртең менен добуш берүүгө келгендер тизмеден өздөрүн таппай калып жатат. Болжол менен 10 адамдын экөө гана добуш берип чыгууда. Муну шайлоо коммиссиясы жарандар №2 формасын толтуруп, консулдук каттоого турбаганы менен түшүндүрүүдө. Эл бул тууралуу жарандарга алдын ала айтып жеткирүү керек болчу деп нараазыланып жатат", — деди Нурматов.

 

Ал элчиликтин алдында тосмо коюлуп бир нече полиция кызматкерлери коомдук тартипти көзөмөлдөп турганын белгилеп өттү.

Бул боюнча Тышкы иштер министрлигинин расмий өкүлү Айымкан Кулукеева жогоруда көрсөтүлгөн учурлар болуп жатканын тастыктады. Ошондой эле ал жарандарга биометрикалык маалыматтарды тапшыруу жана консулдук каттоодон өтүү боюнча алдын ала эскертүүлөр берилгенин кошумчалады.

Эскерте кетсек, Мамлекеттик каттоо кызматынын маалыматына ылайык, чет мамлекеттерде 37 шайлоо участогу ачылып, 18 580 гана кыргызстандык добуш бере алат. Мыйзамга ылайык, добуш берүү укугуна ээ болуу үчүн консулдук каттоого туруп, биометрикалык маалымат тапшыруу керек. Эгер жаран биометрикалык маалыматтарын Кыргызстанда тапшырса №2 формасын толтуруп, консулдук каттоого турушу кажет.

Демек, биометрикалык маалыматын Кыргызстанда тапшырып, бирок чет жакта консулдук каттоого турбагандар добуш берүү укугунан ажырайт.

Өлкө аймагында президенттик шайлоо кандай өтүп жатканын Sputnik Кыргызстан агенттигинин тексттик трансляциясынан окуңуздар>>