БИШКЕК, 14-окт. — Sputnik. Кыргыз-казак чек арасындагы "Ак-Жол" өткөрүү бекетинде 300гө чукул адам кезек күтүп турат. Бул тууралуу Sputnik Кыргызстан маалымат агенттигине Мамлекеттик чек ара кызматынын маалымат кызматы кабарлады.
Эске салсак, 10-октябрда, кечинде кыргыз-казак чек арасындагы үч көзөмөл өткөрүү бекетинде кезек күткөн адамдардын жана унаалардын саны өсүп, жөнөкөй элди бушайманга салган. Бир күн өткөн соң Казакстандын улуттук коопсуздук боюнча комитети өлкөнүн бардык чек араларында атайын операция жүргөндүктөн жогорудагыдай кырдаал түзүлгөнүн маалымдаган.
"Чек арадагы кырдаал өзгөргөн жок. 300гө чукул адам "Ак-Жол" өткөрүү пунктунда текшерүүдөн өтүп, эми казак чек арачылары качан өткөрөт деп күтүп жатышат. Ошондой эле 80ге чукул унаа да тыгында турат", — деп жазылат маалыматта.
"Жеңил унааларды 40 мүнөттө текшеришсе, жүк ташуучу унааларды 40 мүнөттөн бир саатка чейин көзөмөлдөн өткөрүшүүдө. Ал эми адамдарды 15-20 мүнөт кармашууда", — деп кошумчалады Кыргызстандын чек ара кызматы.
"Ак-Тилек" жана "Ак-Жол" өткөрүү бекеттеринде кезекте турган адамдарга ысык тамак берилип, Тез жардам жана куткаруу кызматтары иштеп жатат.
