Өзгөн шаарынын "Кемпир-Абад" суу сактагычына жакын жерде өткөрүлгөн аламан улак тартышта баш байгеге коюлган унаанын акчасы бир катар чабандеске бөлүнүп берилди. Бул тууралуу Көк бөрү федерациясынын вице-президенти Жыргалбек Саматов Sputnik Кыргызстан агенттигине билдирди.
Анын айтымында, баш байгеге коюлган унаанын акчасын бир катар чабандестерге бөлүп берүүнү улакчылар өздөрү сунушташкан. Ал эми төөнү Өзгөн районунан келген спортчу Келдибек Кадыров утуп алды.
"Аламан улак тартыш Өзгөн спорт жана жаштар биримдиги тарабынан демилгеленген. Башкы максаты — улуттардын ынтымагын чыңдоо менен катар жаш муунду спортко тартуу. Анткени Өзгөн районунда 26 улуттун өкүлүнөн турган 286 миң жаран жашайт. Бүгүнкү мелдеште байгеге коюлган төө, үч тай, токулган ат жана тогуз жандык, мындан сырткары, акчалай сыйлыктар чабандестерге тапшырылды", — деди Саматов.
"Бир үй-бүлөдөн беш бир тууган "Достук" деген топ түзгөнбүз. 14 жашымдан бери спорттун бул түрү боюнча мелдештерге катышып келем. Учурда 34 жаштамын. Аламан улак тартыш — менин хоббим. Бул мелдешке чыккан спортчудан шамдагайлык, зиректик талап кылынат", — деди Ниязов.
Иш-чарага коңшулаш Өзбекстандын Кокон шаарынан да келген коноктор күбө болушту.
Уюштуруучу Максат Ибраимовдун айтымында, улак тартышка жалпы үч жүздөн ашуун чабандес катышкан.
"Чабандестердин жана оюндун көрүүчүлөрүнүн коопсуздугу үчүн "Тез жардам" кызматын да чакырган элек. Бактыга жараша, мелдеш учурунда бир да спортчу же көрүүчү жабыр тарткан жок", — деди Ибраимов.
Ал Өзгөн спорт жана жаштар биримдиги тарабынан мындай мелдештер жыл сайын салт катары өткөрүлүп тургандыгын кошумчалады.
Эске сала кетсек, 10-октябрь күнү Өзгөн шаарында Кемпир-Абад суу сактагычынын айланасында бир катар улуттардын өкүлдөрүнүн биримдигин чыңдоо максатында аламан улак тартыш уюштурулган.
