БИШКЕК, 26-сен. — Sputnik. Жогорку Кеңештин социалдык маселелер, билим, илим, маданият жана саламаттык сактоо боюнча комитети улуттук спорт оюндарын сактоо жана өнүктүрүү маселесин кароодо. Бул тууралуу Жогорку Кеңештин маалымат кызматы кабарлады.
Билдирүүгө караганда аталган демилгени өкмөт көтөрүп чыккан.
"Спорттун улуттук түрлөрү менен салттуу оюндар кыргыз элинин маданиятынын ажырагыс бөлүгү болуп саналат. Алардын көп кылымдык тарыхый таржымалы бар. Эң мыкты улуттук салттар иргелип отуруп, муундан муунга өтүүдө. Ошондон улам, иштеп жаткан мыйзамга "спорттун улуттук түрлөрү" жана "салттуу оюндар" деген түшүнүктөрдү киргизүү аркылуу аларды сактап калуу жана өнүктүрүү демилгеси сунушталууда", — деп жазылат маалыматта.
Эске салсак, 2016-жылдын 31-мартында Кыргызстан ЮНЕСКОнун адамзаттын материалдык эмес маданий мурасынын репрезентативдик тизмесине киргизүү үчүн "Көк бөрү – салттуу ат оюну" номинациясын өлкө атынан сунуш кылган.
