Ырчы Клара Алибекова өзү тууралуу тартылган видеонун чоо-жайын айтып берди

БИШКЕК, 8-окт. — Sputnik. Милициянын жасаган мамилесинен кийин эч кимге жардам сурап кайрылган эмесмин. Бул тууралуу Sputnik Кыргызстан маалымат агенттигине ырчы Клара Алибекова билдирди.

Эске салсак, 5-октябрь күнү интернетке укук коргоо органдары тарткан Клара Алибекованын видеосу тарап кеткен. Анда тартип сакчыларына ырчы өзүнө кол салуу болгонун айтып, жардам сурап кайрылат. Бирок милиция кызматкерлери ага дароо жардам бергендин ордуна мыскылдаган суроолорду берип, шылдыңдап видеого тартып интернетке жүктөп коюшкан. Окуя Бишкек шаарында болгон.

Ырчынын айтымында, бул окуя бир жума мурун эле болгон, бирок милициянын ага болгон шылдың мамилесинен кийин кайра тартип коргоо органдарына кол салуу иши боюнча кайрылган эмес.

"Караңгы болчу, тойдон чыгып, дүкөнгө кирип чыксам эле, мас окшойт, жаш эле бала көчөдөн мага кол салып, "муунтам" деп кирди. Бул учурда мен Кайгуул унаасын көрүп калып жардам сурап ошону көздөй чуркадым. Мага кол салууга аракет кылган бала коркуп кетти окшойт, качып кетти. Бирок милиция жардам бергендин ордуна мени атайын эле видеого тарталы деген максатта провокациялык суроолорду беришиптир. Аны мен азыр видеону көрүп байкап жатам. Видеодо көрсөңүздөр "алдагыны алып барып камай берчи" деген жери бар, бирок унаада милициядан башка эч ким жок болчу. Анан да "сени зордуктайм дедиби" деген суроону кайталап беришкен. Булардын максаты мени шылдыңдап видеого тартып, интернетке жүктөө болуптур. Болбосо чыныгы тартип сакчылары жардам сурап келерим менен мага кол салган адамдын артынан чуркап же моралдык жардам көрсөтмөк да. Видеого тартып бүтүп, мени унаадан түртүп түшүрүп, катуу айдап кетип калышты. Үйгө такси менен эптеп жеттим. Бул видео чыккандан кийин абалым ого бетер начарлады", — деди ырчы.

Ал ошондой эле катуу коркуп калгандыктан жакын арада ооруканага жата турганын айтты.

"Катуу коркуп калыптырмын. Азыр деле өзүмө жакшы келе албай жатам. Ата-энем, туугандарым ден-соолугума кабатыр болуп ооруканага жатып дарыланып чык деп жатышат", — деди Алибекова.

Клара Алибекова аны видеого тартып алган милиция кызматкерлеринин кебетелерин жакшы жаттабай калган. Мындан улам ИИМ аталган кызматкерлерди табуу бир аз кыйынчылык жаратканын билдирген.

Ал эми ИИМдин маалымат кызматы учурда ырчыны видеого тартып, интернетке жүктөгөн тартип сакчылар ким экендиги тактала электигин, учурда бул иш боюнча териштирүү жүрүп жатканын айтты.