ТАШКЕНТ, 5-окт. — Sputnik. Кыргызстандын президенти Алмазбек Атамбаевдин Өзбекстанга болгон мамлекеттик сапарынын алкагында коңшу өлкөнүн президенти менен тар чөйрөдөгү жолугушуусу болуп өттү.
Сүйлөшүүлөр алдында өзбек лидери Атамбаевдин келиши Бишкекте жетишилген келишимдердин символдук уландысы экендигин белгиледи.
"Аз убакыт аралыгында эки президенттин эрки менен ушул деңгээлдеги өз ара түшүнүшүүгө келдик. Буга боордош эки эл өзү баа берсе керек. Эгер саясий маселелерди алып карай турган болсок, чечиле элек бир дагы маселе калган жок. КМШ, БУУ жана Ислам уюмунун алкагында бири-бирибизди колдоп жатабыз. Бул жаатта суроо жок", — деди Мирзиёев.
"Дагы бир маанилүү аспектилердин бири чек арадагы көзөмөл өткөрүү пунктуларынын ачылышы болду. Эл президенттерге ыраазычылыгын билдирүүдө", — деп белгиледи ал.
Мирзиёев Атамбаевдин азыркы сапары башка тармактар боюнча, анын ичинде аскер техникасы жаатында кызматташууга жол ачарын билдирип, буга кыргыз делегациясынын курамында күч структураларынын өкүлдөрү көп экени далилдигин кошумчалады.
Атамбаев өз учурунда тарыхый чечимдердин кабыл алынышына Мирзиёевдин салымы чоң экенин билдирди.
"Чек арадагы көзөмөл өткөрүү пунктуларынын ачылышы Мирзиёевдин алысты көрө билгендигинен улам ишке ашты. Биз бир мамлекеттин, Кокон хандыгынын курамында болгонбуз. Биз бирге болгондо гана күчтүүбүз", — деди Кыргызстандын президенти.
Ал ошондой эле өткөндү ок менен атсаң, келечек замбирек менен атарын белгилеп өттү.
