ОШ, 27-сен. — Sputnik. Ош шаардык соту милициянын мурдагы кызматкери Майрамбек Нажиевдин өлүмүнө шектүү катары кармалган жаранды үч жылга шарттуу түрдө эркинен ажыратты. Бул тууралуу жабырлануучунун жактоочусу Болот Баетов Sputnik Кыргызстан агенттигине билдирди.
Анын айтымында, шектүү катары кармалган Алай районунун тургунуна карата Кылмыш жаза кодексинин 104-беренесинин негизинде кылмыш иши козголгон.
"Айыпкер каза болгон Майрамбек Нажиевдин ата-энесине моралдык жана материалдык чыгымын төлөп берген. Андан соң жабырлануучу тарап тосмо арыз жазды. Ош шаардык соту шектүүнү үч жылга шарттуу түрдө эркинен ажыратты", — деди Баетов.
Алгач облустук милиция Майрамбек Нажиев автокырсыктан көз жумгандыгын маалымдаган. Бирок маркумдун сөөгү эксгумацияланып, кошумча дайындалган соттук-медициналык экспертизанын корутундусу Нажиевдин башына автокырсыкка чейин эле катуу сокку урулгандыгы аныкталган.
Милициянын сержанты Майрамбек Нажиев Алайдагы мектептин курулуш иштерине чейин Ички иштер министрлигинин алдындагы атайын адистештирилген күзөт кызматынын Кадамжай райондук бөлүмүндө иштеген.
Эске салсак, былтыркы жылдын 21-сентябрында Mersedes-Benz үлгүсүндөгү унаа Сары-Могол айылынан Сары-Ташка бара жатып жолдун түштүк тарабындагы тосмону сүзүп кырсыкка кабылган. Натыйжада унаанын алдыңкы отургучунда отурган Нажинов алган жараатынан улам окуя болгон жерде каза болгон.
