БИШКЕК, 19-сен. — Sputnik. Жумгалдын Байзак айылында Түлкү уулу Качыке баатырдын 285 жылдыгы белгиленип, анын урматына ат оюндары өткөрүлөт. Бул тууралуу Көк бөрү федерациясынан билдиришти.
Аталган иш-чара 22-23-сентябрь күндөргө белгиленген. Анын алкагында кыргыз күрөш, ат чабыш, көк бөрү, эр эңиш, кыз куумай оюндары уюштурулат.
Байгелүү орундарга беш автоунаа жана акчалай сыйлыктар коюлган.
Түлкү уулу Качыке баатыр болжол менен 1730-жылы туулган. Ал калмак баскынчылыгына каршы согушта эрдик көрсөтүп баатыр атка конгон. Такты атасынан мурастап калып узак жылдар бою Кулжыгач элин (Жумгал, Суусамыр аймагы) башкарып келген. Качыке баатыр 90 жаштан ашып көз жумган. Анын сөөгү азыркы Байзак айылынын түндүк-батыш тарабына коюлган.
