БИШКЕК, 19-сен. — Sputnik. Өзбекстан Бангладешке келген мьянмалык 50 миң качкынга гуманитардык жардам жөнөттү. Бул тууралуу РИА Новости "Жахон" маалымат агенттигине таянуу менен билдирди.
18-сентябрда Өзбекстандын жиберген жардамы Бангладештеги Кызыл жарым ай коомунун Дакка шаарындагы башкы кеңсесине жеткирилген.
Маалыматка ылайык, берилген жардамдын ичинде күрүч, шекер, жаңгак, кургак сүт, печенье, жууркан-төшөк, бут кийим, дары-дармек жана минералдык суу бар.
Кыргызстандын муфтияты да бейкүнөө кишилерге жасалган зомбулукту сынга алган.
Ракхайн штатындагы мусулман-рохинжалар менен будда дининдеги бирмалыктардын ортосундагы келишпестик бир нече жылдардан бери уланып келет. Чатак аталган мамлекетте бийлик аскерлерден жарандык өкмөткө өтүп, демократиялык реформалар башталганда күч алган.
