БИШКЕК, 18-сен. — Sputnik. Чехиянын Liglass Trading CZ, SRO компаниясынын башкы директору Михаэль Смелик маалымат жыйынында Жогорку Нарын каскадына ГЭС куруу боюнча 37 миллион долларды качан төлөй тургандыктары жөнүндө жооп берүүдөн баш тартты.
Ал журналисттердин "каражатты качан төлөйсүздөр" деген суроосуна "компания буга чейинки тажрыйбаларын эске алуу менен журналисттер менен сүйлөшүүнү каалабай турганын" билдирди.
"Жооп берүү туура болбой калат. Аны силердин жана биздин өкмөт менен сүйлөшүү керек. Биз силердин өкмөт менен бардык пункттар боюнча сүйлөшүү жүргүзүп жатабыз. Андыктан так бир нерсе айта албайбыз. Бирок азыр иштер аткарылып, долбоорду жасап жатабыз, техникалык экономикалык негиздеменин акыркы версиясы даяр", — деди Смелик.
Буга чейин чех компаниясы 37 миллион долларды канчасына чейин төлөшү керектиги боюнча түрдүү пикирлер айтылган. Акырында Өнөр жай, энергетика жана жер казынасын пайдалануу мамлекеттик комитети Liglass Trading CZ, SRO компаниясы каражатты 19-сентябрга чейин төлөшү керектигин билдирген.
Кыргыз өкмөтү 2017-жылдын 10-июлунда Чехиянын Liglass Trading CZ, SRO компаниясы менен Жогорку Нарын каскадына жана чакан ГЭСтерди куруу боюнча келишим түзгөн.
Аталган компания Кыргызстандын "Русгидрого" карыз болгон 37 миллион долларды төлөө милдетин алган.
