БИШКЕК, 8-сен. — Sputnik. Өкмөттүн маалымат кызматы Жогорку Нарын ГЭСин курганы жаткан чехиялык Liglass Trading CZ, SRO компаниясынын тегерегиндеги чуу боюнча премьер-министр Сарпар Исаковдун пикирин Sputnik Кыргызстан агенттигине алып берди.
Жакында эле ЖМКлар Liglass Trading компаниясы акциясын АКШда сатыкка коюп, алардын баасы 10-июлдан 18-августка чейин 0,005тен 0,39 долларга чейин көтөрүлгөнүн, тагыраагы 7 миң пайызга өскөнү көрсөтүлгөнүн жазышкан. Ошондой эле журналисттер бул жөн гана көз боемочулук болушу мүмкүн экенин айтып, чех компаниясы Кыргызстанда ГЭС курууну эч качан ойлонбогону да мүмкүн деп божомолдошкон.
"Нарын каскады боюнча бизде 18-сентябрга чейин убакыт бар. Күтөбүз. Эгер финансы каражаттары түшпөсө, алар менен келишимди жокко чыгарабыз. Анда жаңы сынак жарыялоого туура келет", — деди Исаков.
Премьердин айтымында, бул компания Кыргызстандын эч бир мыйзамын бузбай, тендердин бардык тепкичтерин басып өтүп, 10 чакан ГЭС куруу боюнча сынакты жеңип алган. Кийинчерээк инвесторлор менен Жогорку Нарын каскады боюнча макулдашуулар болгон.
"Биз тендер жарыялап жатканда Жогорку Нарын ГЭСинин курулушу боюнча айтканбыз, аталган компания ошого жараша документтерин тапшырган. Эгер бул ишкана жеңип чыкса, эмне себептен биз алардан баш тартышыбыз керек? Мен буга чейин эле компанияны Алмазбек Атамбаевди Чехиянын лидери Земан мырза өзү сунуштаганын айткам”, — деди өкмөт башчы.
Аталган компания Кыргызстандын "Русгидрого" карыз болгон 37 миллион долларды төлөө милдетин алган.
Атамбаев кийин "Русгидро" ГЭС курууга ашыкпаганын айтып, чех компаниясы менен түзүлгөн келишим россиялык компанияга караганда өлкө үчүн пайдалуу экенин баса белгилеген.
Ал эми "Русгидро" Кыргызстандагы Жогорку Нарын каскадына курулчу ГЭСке кеткен чыгымдарды сот аркылуу кайтарып алууну көздөп жатканын билдирди.
Айта кетсек, Liglass Trading компаниясынын ишмердүүлүгү боюнча сын пикирлер бир гана кыргыз ЖМКларында эмес, чехиялык басылмаларда дагы жазылып келет.
