БИШКЕК, 18-сен. — Sputnik. Индияда курулуш иштери 30 жыл мурда башталган Сардар-Саровар плотинасы ишке берилгендигин РИА Новости жазды.
Нармада дарыясына курулган плотинанын бир нече штатты сугат суусу жана электр менен камсыздоодо ролу чоң экени айтылды.
Курулуш иштери 30 жылга созулуп кетишине бир нече жагдай себеп болгон. Алардын эң негизгиси — азыркы плотинанын ордунда мурда жайгашкан айыл-кыштактардын тургундарынын каршылыктары.
"Мамлекет элди башка жакка көчүрүп, компенсация төлөп бергенине карабай, элдин бир бөлүгү ата-бабасынын жеринде жашап калабыз деген оюнан кайтпай, бир нече ирет сотко кайрылып келишкен", — деп жазылат макалада.
Маалыматка караганда, учурда плотинанын бийиктиги — 139 метр, узундугу 1,2 чакырым. Анда сакталган сугат сууну миллионго жакын фермер, ал эми ичүүчү сууну 40 миллион адам колдоно алат.
