БИШКЕК, 16-сен. — Sputnik. Бишкектеги Ботаникалык бакта кайтадан өрт чыкканын күбө Sputnik Кыргызстан агенттигине билдирди.
Анын айтымында, өрт Ботаникалык бактын түштүк бөлүгүндө чыккан.
Ал эми Борбордук өрт өчүрүү кызматы атайын бригада саат 16:02де аталган дарекке чыгып кеткенин маалымдады.
Өзгөчө кырдаалдар министрлиги билдиргендей, чыккан өрт саат 17:20да толугу менен өчүрүлгөн.
"Өрт 400 чарчы метр жерге жайылган", — деп айтылат маалыматта.
Тилсиз жоонун алдын алуу үчүн бир өрт өчүрүүчү машина тартылган.
Белгилей кетсек, Ботаникалык бакта буга чейин да бир нече жолу өрт чыгып, анын жетекчиси Медет Ахматов аталган жайда коопсуздукту сактабагандыгы үчүн премьердин буйругунун негизинде кызматтан алынган. Өкмөт тараткан билдирүүгө ылайык, июль, август айларында Ботаникалык бакта сегиз жолу өрт катталган.
