БИШКЕК, 25-июл. — Sputnik. Жогорку Нарын каскадына ГЭС кура турчу Liglass Trading CZ компаниясын Кыргызстанга Чехиянын президенти Милош Земан өзү сунуштаган. "Lidové noviny" гезитинин жазганына караганда, бул тууралуу мамлекет башчы радиого интервью берип жатып билдирген.
Земандын айтымында, ал Кыргызстандын президенти Алмазбек Атамбаев менен Liglass Trading CZ компаниясы тууралуу Астанадагы EXPO-2017 эл аралык көргөзмөсү учурунда сүйлөшүүлөрдү жүргүзгөн.
Ал ошондой эле аталган компания Чехиянын Соода жана өнөр жай министрлиги тарабынан сунушталганын айтып, компания тууралуу толук маалыматка ээ болбогондугун билдирген.
Эскерте кетсек, 10-июлда Алмазбек Атамбаевдин катышуусунда КР өкмөтү Чехиянын Liglass TradingCZ, SRO компаниясы менен Жогорку Нарын каскадына ГЭС жана чакан гидроэлектростанцияларын куруу боюнча келишимге кол койгон.
Ошондой эле аталган чех компаниясынын чет жактагы ишмердигин колдогон Чехиянын экспорт банкы аталган компания тууралуу билбей турганы маалыматтарда айтылган. Бир катар ЖМКлар Liglass Trading CZ, SRO компаниясынын гидроэнергетика боюнча тажрыйбасы жоктугун белгилешти.
Андан сырткары, чех президентинин канцеляриясынын башчысы Вратислав Мынарж аталган компанияны Сапар Исаковго таңуулап Кыргызстанга сунушталганы боюнча кабарлар чыккан. Ошол эле учурда элчилик аталган компанияга ишеним артуугу болбой турганын билдиришкенин жазышты.
18-июлда аталган компаниянын өкүлдөрү Жогорку Нарын каскадына журналисттерди алып барган. Анда Liglass Trading CZ, SRO компаниясынын Кыргызстандагы долбоорлорунун директору Иржи Войтеховский күмөн санаткан жагдайлар боюнча суроолорго жооп берген. Ал Жогорку Нарын каскадына салына турчу төрт ГЭСти курууга компания 500 миллион доллар бөлөрүн, анын ичинен биринчи этапта Ак-Булуң менен Жогорку Нарын-1 ГЭСине 230 миллион доллар сарптоо каралганын билдирген.
