БИШКЕК, 8-сен. — Sputnik. Кыргызстандын бийлигине жаш, бедели бийик саясатчылар келди, алар аз убакыттын ичинде көп ийгиликтерди багынтат. Бул тууралуу президент Алмазбек Атамбаев Кочкор районунун Чекилдек айылындагы Кайып Темиров атындагы мектептин ачылыш аземинде айтканын өлкө башчынын маалымат кызматы билдирди.
Эскерте кетсек, президент ушу тапта Нарын облусунда иш сапары менен жүрөт. Анын алкагында Нарын шаарынын, Ат-Башы, Ак-Талаа райондорунун жашоочулары менен жолугуп, элдин суроолоруна жооп берди.
Өз сөзүндө Атамбаев өлкөнүн өнүгүшүнүн негизи билим берүү экенин белгиледи.
"Келечек билимдүү кыргызстандыктардын колунда. Ошондуктан бул тармакка өзгөчө көңүл бурулуп, бюджеттин 24 пайызы билим берүүгө жумшалат. Бизде газ, нефти жок, балдарыбыз — биздин келечек", — деди өлкө башчы.
"Өлкө бийлигине жаш, бедели бийик саясатчылар келди. Жакын арада алар реалдуу реформаларды ишке ашырышат деп ишенем", — деди Атамбаев.
Мамлекет башчы жаңы мектептин имаратын, класстарды, спорт залды көрүп, ноутбук жана проектор алууга сертификат тапшырды.
Белгилей кетсек, аталган мектеп 150 орунга ылайыкташып, жалпы жонунан ага 51 миллион сом жумшалган.
