БИШКЕК, 6-сен. — Sputnik. Кариб бассейни аралдарына жана АКШнын түштүк-чыгыш аймактарына "Ирма" бороону жакындап келгенин жана ал буга чейин болгон "Харви" бороонунан да күчтүү экенин BBC телеканалы билдирди.
"Ирма" бороонуна бешинчи деңгээл ыйгарылды. Шамалдын ылдамдыгы саатына 220 чакырымга жетет. Мындай катуу ылдамдыктагы шамал үйлөрдүн чатырын оңой эле учуруп, пальмаларды тамыры менен жулуп кетет.
АКШ президенти Дональд Трамп Флорида штатына, Пуэрто-Рико менен чектешкен Америка аймактарына жана Виргин аралдарына өзгөчө кырдаал киргизди.
Учурда Флорида штатынын бийлиги бардык аскерлерди кызматка тартып, түштүк жээктеги туристтер менен тургундарды коопсуз аймактарга көчүрүүдө.
