БИШКЕК, 5-сен. — Sputnik. Саратов облусундагы жол кырсыгынан жабыркаган кыргызстандыктардын арасындагы бир аял кайра жандандыруу бөлүмүндө жатканын КРдин Россиядагы элчилигинин маалымат кызматы билдирди.
Белгилей кетсек, 4-сентябрда Сызрань — Саратов — Волгоград кан жолунун 298-чакырымында жол тандабас менен минивэн (ичинде беш кыргызстандык болгон) кагышкан. Анын кесепетинен 9 киши түрдүү жаракаттарды алган.
Аймактык укук коргоо органдарынын билдиришинче, жабыркагандар Саратов облустук ооруканасына жеткирилген.
Кыргызстандык бир аял кайра жандандыруу бөлүмүндө болсо, экөө сынык бөлүмүнө жаткырылган. Дагы эки кыргызстандык медициналык кароодон өткөндөн кийин Москвага жөнөшкөн.
Мекендештерге көңүл кош карабаган кыргызстандыктар жардам берип жатышат.
Учурда жол кырсыгынын чоо-жайы такталып жатат. Минивэндин айдоочусу суракка алынып, коё берилген.
