БИШКЕК, 30-авг. — Sputnik. Алдыдагы кош майрамга жана дем алыш күндөргө карата унаа жана турак жай салыгын төлөөнүн мөөнөтү узартылганын Мамлекеттик салык кызматы билдирди.
Эскерте кетсек, буга чейин автоунаа, турак жай жана жердин салыгын 1-2-сентябрга чейин төлөө керектиги айтылган.
"1-2-сентябрь майрамга жана дем алышка туш келгендиктен унаа, турак жай жана жер салыгын төлөөгө жетишпей калгандар 4-сентябрга чейин төлөй алышат. Акчаны айрым банк мекемелеринин кассаларынан, төлөм терминалдары, мобилдик жана интернет банкинг аркылуу төлөөгө болот", — деп айтылат маалыматта.
Салыктарды өз убагында төлөбөгөндөр үчүн 2000 сом өлчөмүндөгү административдик айып каралган. Мындан тышкары, салык төлөө мөөнөтү өткөн ар бир күн үчүн туум эсептелмекчи.
