БИШКЕК, 26-авг. — Sputnik. Оштун Алай районунда ЗИЛ унаасы менен кагышкан Hyundai Porter машинасынын айдоочусу 38 жана 36 жаштагы эки уулу менен каза болду. Бул тууралуу Ош облустук Кайгуул милиция бөлүмүнүн маалымат катчысы Айбек Бечелов билдирди.
Анын айтымында, кырсык 26-августка караган түнү саат 01.30дар чамасында Ош — Эркечтам жолунун 233-чакырымында болгон. Нур айылынын 63 жаштагы тургуну өзүнүн Hyundai Porter унаасы менен чөп жүктөп, Сары-Таш айылынан келе жаткан. Ал эми ЗИЛ чөп жүктөп келүү үчүн Сары-Ташка бара жаткан.
"Эки унаанын кагылышуусунан Hyundai Porter унаасындагы үч киши кырсык болгон жерде каза болду. Жүк ташуучу машинадагы беш адам жаракат алып, ооруканага жеткирилишти", — деп айтылат маалыматта.
Учурда Ош облустук Кайгуул милиция бөлүмүнүн кызматкерлери кырсыктын себебин тактап жатышат.