Кыргызстандын командасынын аттары багылып жаткан сарай "Казанат" стадионунан 25 чакырым алыста жайгашкан. Күнүгө атайын жылкы ташууга ылайыкташкан камАЗ менен алып барып, алып келишет.
Көк бөрү федерациясынын вице-президенти Жыргалбек Саматов Астанадагы тааныш достору менен сүйлөшүп, аргымактарды алардын сарайында кармап турууну макулдашканын айтты.
"Аттарыбыз кармалган сарайдын шарттары абдан жакшы, ичине кондиционер, видео камералар коюлган. Аргымактарды атбагарлар менен өзүбүздүн балдар карап жатышат", — деди Саматов.
Кыргызстан курама командасынын мал доктуру Калыбек Алтыбаев аттардын абалы жакшы экенин билдирди.
"Аттарды эртең менен жүктөп 25 чакырымга алып барып, оюн бүткөндө кайра алып келип жатабыз. Болгон кыйынчылык ушул. Калганы жакшы, аттар жаракат алган жок. Ар бир аттын башка-башка мүнөзү болот. Ар бирине өзүнчө мамиле кылыш керек. Мисалы кээ бир аттар эртең менен баскысы келбей чыкса, кайтып жатканда унаага өздөрү эле секирип чыгат", — деди Алтыбаев.
Эки тайпадан эң көп упай топтоп чыккан командалар 27-августта финалдык беттеште намыс талашат. Өз тайпасында чогулткан упайы менен экинчи сапка чыккан эки топ үчүнчү орун үчүн күч сынашат.
Төртүнчү күндүн жыйынтыгы төмөндөгүдөй болду:
- Кыргызстан — Тажикстан: 15:2
- Казакстан — Кытай: 15:4
- Афганистан — Россия: 5:1
- Өзбекстан — АКШ: 11:1
- Монголия — Түркия: 10:7
Венгриянын командасы Азербайжан келбей калганы үчүн автоматтык түрдө жеңүүчү деп табылды.
Көк бөрү боюнча дүйнө чемпионатынын байге фондусу 18 миллион теңге (3,7 миллион сом). Үчүнчү орунга 2 миллион теңге (413 миң сом), экинчи орунга 5 миллион теңге (1 миллион 34 миң сом) коюлган. Ал эми баш байгени багындыргандар 10 миллион теңгеге (2 миллион 68 миң сом) ээ болот.
