Астана: паспорту текшерүүгө алынган түркиялык көк бөрүчүлөр оюндан кетүүгө белсенди

БИШКЕК, 21-авг. — Sputnik. Астанада өтүп жаткан көк бөрү боюнча дүйнө биринчилигинде түркиялык улакчылар АКШ командасы алардын паспортун текшерүүгө алганына нааразы болду. Бул туурасында Түркиянын салттык спорттору боюнча ардактуу президенти Алпарслан Жейлан журналисттерге билдирди.

Анын айтымында, бүгүн оюн талаасына АКШ менен Түркия командасы чыккан. Натыйжада түркиялык улакчылар 7:1 эсеби менен жеңишке жеткен. Бирок оюн бүткөндөн кийин АКШ курамасы атаандаштарынын командасында Кырыгызстандын жарандары бар деп каршылыгын билдиришкен. Америка делегациясы түркиялык улакчылардын паспортун текшерүүгө алышкан. Буга нааразы болгон түрк оюнчулары жагдайга уюштуруучулар тарабынан чара көрүлбөсө оюндан баш тартып кетерин айтышты.

Түркия курамасында вандык кыргыздар ойношкон. Команданын капитаны Алпарслан Кутлу Sputnik Кыргызстан агенттигинин кабарчысына оюнга чыгаар алдында маек берген.

"Албетте, казак жана кыргыз улакчылары менен тең тайлаша ойной албайбыз. Бирок алар менен ойногон өзүнчө ырахат тартуулайт. Өткөн жылы Түркиядагы окуялардан улам Кыргызстанга бара албай калдык. Түркияда бир гана биз көк бөрүнү ойнойбуз. Ал жакта дагы соңку үч-төрт жылдан бери бул оюн билине баштады. Арабызда мамлекеттик кызматкерлер да бар. Ар кайсы шаарлардан чогулуп келдик", — деген ал.

Белгилей кетсек, кыргыз улакчылары така чырынын улам Монголия менен беттешүүгө учурунда чыкпай калгандыктан Кыргызстандын командасы жеңилди деп эсептелинген. Учурда бул маселе боюнча сүйлөшүүлөр жүрүп жатат.

Белгилей кетсек, Казакстанда "ЭКСПО-2017" эл аралык көргөзмөсүнүн алкагында түрк элинин салттык спортуна кирген "көкпар" (көк бөрү) оюну боюнча дүйнө чемпионаты 20-28-август күндөрү Астананын "Казанат" ат майданында өтүүдө.