Бектемирова: сурамжылоонун жыйынтыгы менен мыйзамдарды өзгөртүүгө болот

Жүргүзүлгөн сурамжылоонун натыйжасында мыйзамдарга өзгөртүү киргизсе болот. Бул тууралуу Стратегиялык изилдөөлөр улуттук институтунун илмий кызматкери Айнура Бектемирова Sputnik Кыргызстан радиосуна маек куруп жатып билдирди.

Маалыматка ылайык, аталган институт Кыргызстандын жаштары арасында гигиена боюнча сурамжылоо жүргүзгөн. Ал ЮНИСЕФ уюму менен биргеликте ишке ашырылып жаткан "М-Репорт" долбоорунун алкагында жасалды.

Бектемированын айтымында, 2016-жылдын октябрь айында башталган долбоорго Кыргызстандын бардык 40 районунан респонденттер катышууда. Ушу тапта гигиена темасы талкууланып жаткан мезгил.

"Биздин респонденттердин жооптору мыйзам өзгөртүүгө түрткү боло алат. Анткени, биз алынган жоопторду топтоп, тийиштүү мамлекеттик органдарга жөнөтөбүз, алар мыйзамга өзгөртүү киргизүүнү демилгелөө укугуна ээ", — деди Бектемирова.

Адис сурамжылоонун темасы эки жумада бир өзгөрүп турарын белгиледи.