БИШКЕК, 10-авг. — Sputnik. Борбордук шайлоо комиссиясынын жумушчу тобу бүгүнкү жыйынында президенттикке талапкерлигин көрсөткөн Өмүрбек Текебаевдин кыргыз тилинен тест тапшыруусуна шарт түзүү боюнча анын өкүлүнүн өтүнүчүн канааттандырган жок.
Боршайкомдун 12 мүчөсүнүн тогузу бул чечимди колдоого алса, үч мүчөсү — Атыр Абдрахманова, Гүлнара Журабаева жана Назарали Арипов макул эместигин билдирди.
Учурда соттолуп жаткан Өмүрбек Текебаевдин жактоочулары ага кыргыз тилинен тест тапшырууга шарт түзүп берүү үчүн Боршайкомго кайрылган. Буга чейин БШК Текебаевдин кыргыз тилинен тест тапшырып-тапшырбоосун сот карашы керектигин жүйө келтирип, бул маселени караган эмес. Бирок сот Текебаевдин маселесин БШК карашы керектигин айткан.
Кыргызстанда президенттик шайлоо 15-октябрда өтөт.
